#Anchor-2mcg "Anchor-2mcg"

TÍÐINDI

#Anchor-o0pe "Anchor-o0pe"

29-10-2018

Fuglfirðingar beinanvegin á odda

Niels Petersen | 29/10/2018

Øll liðini í bestu billarddeildini hava nú spælt eitt umfar, og beinanvegin legði besta lið fuglfirðinga seg á odda. Jákup L. Baldvinsson og Jens Kjartan Feilberg vunnu á næstbesta fuglfjarðaliðnum, sum er mannað av Áranti Berjastein og Dánjali Paula Joensen. Úrslitið bleiv 8-0. Aðrastaðni vann besta klaksvíksliðið 6-2 á næstbesta klaksvíksliðnum. Síðsti dysturin í fyrsta umfarinum var í Havn, har havnarmenn og tvøramenn samdust um ein 4-4 javnleik.


Um hugt verður eftir miðaltalinum eina, so er Hallur Joensen stinnastur í løtuni, og er á odda við 31,25. Tættast honum er Jákup Baldvinsson, sum hevur 28,57.

Næsta umfar í 1. Deild verður spælt 03. november, og tá er dystarskráin henda:

BFF2 - KLBF1
KLBF2 - HABI1
TVBF1 - BFF1

 

14-10-2018

Haldor Holm hattrik til Jákup

Niels Petersen | 14/10/2018

Um vikuskiftið varð 29. útgávan av serligu billardkappingini Haldor Holm Cup avgreidd í Klaksvík. Fyrsta kappingin var afturi í 1989, og spælt er á hvørjum ári, undantikið ár 2000. Kappingin er blivin vunnin av mongum dugnaligum leikarum, og ársins útgáva bleiv vunnin av Jákupi Lundsbjerg Baldvinssyni úr Billardfelag Fuglafjarða. Hetta var triðja árið á rað, at evnaríki fuglfirðingurin streyk avstað við fremsta plássi. Næstur suverena Jákupi kom Páll Heri Nolsøe, eitt ungt stjørnuskot úr Tvøroyrar Billardfelag, og nummar trý bleiv mest vinnandi Haldor Holm Cup leikarin, Kristian Suni Høgnesen úr Klaksvíkar Billardfelag.


Kristian Suni Høgnesen og Henrik Pedersen eru teir, ið hava vunnið kappingina oftast. Teir hava sjey sigrar hvør. Í hølinum á teimum er Hallur Joensen, sum hevur vunnið kappingina fimm ferðir. Og við einum reinum hattrikki av Haldor Holm sigrum otar Jákup seg nú enn tættari absolutta oddinum.

 

Úrslit frá Haldor Holm Cup 2018

1. Jákup L. Baldvinsson - 2386 (34,55 í miðal)
2. Páll Heri Nolsøe - 2254 (28,18)
3. Kristian Suni Høgnesen - 2220 (27,75)
4. Jens Kjartan Feilberg - 1912 (23,9)
5. Jógvan Jørgensen - 1572 (23,5)

 

09-10-2018

Haldor Holm Cup verður leygardagin

Niels Petersen | 9/10/2018

Leygardagin 13. oktober fer árliga Haldor Holm Cup kappingin av bakkastokki. Serliga steypakappingin er fyri fimm teir bestu leikararnar í liðkappingini fjør, og hesaferð stendurkappingin millum Jákup L. Baldvinsson og Jens Kjartan Feilberg úr BFF, Páll Hera Nolsøe úr TVBF, Kristian Suna Høgnesen úr KLBF og Jógvan Jørgensen úr HABI. Byrjað verður kl. 10 leygarmorgunin, og spælistaðið er, sum tað plagar, í Klaksvík.

Vinnarin síðstu tvey árini er Jákup L. Baldvinsson, og tá hann aftur telist millum teir bestu hesaferð, má hann metast sum favoritturin til at gera hattrick. Jákup hevur vunnið kappingina fýra ferðir samanlagt, men teir sum hava vunnið kappingina flestar ferðir eru Kristian Suni Høgnesen og Henrik Pedersen (7 ferðir) og Hallur Joensen (5 ferðir).

Leygardagin verða fyrstu dystirnar í liðkappingin í 2. og 3. Deild eisini spældir, so tað hendir nógv longu hetta fyrsta billardvikuskiftið.

1. Deild byrjar 20. oktober, og tá koyra allar kappingarnar í fullari ferð.

Vónandi fáa vit eitt hendingaríkt, gott og, ikki minst, spennandi kappingarár.

#Anchor-o0pe "Anchor-o0pe"

11-09-2018

Væleydnað Lions Cup kapping

Niels Petersen | 11/9/2018

10 billardleikarar hittust á Tvøroyri um vikuskiftið, har kappast varð í Lions Cup steypakappingini. Hetta er fyrsta kappingin av hesum slag, og er tað einstaklingakapping fyri leikarar sum hava eitt miðaltal undir 10. Sum navnið lýsir tað so væl, so er tað Lions Club Suðuroy sum stuðlar kappingini. Somikið væl eydnaðist kappingin, at allir vóru á einum máli um, at hetta verður eitt afturvendandi tiltak, og allir vilja tekna seg til komandi ár. Tað er tó nakað tíðliga við tí enn, men gleðiligt er tað í øllum førum, at so væl er tikið ímóti hesum nýggja átaki, billardítróttini at frama.

Havnarmenn luttóku við trimum leikarum, og tað má sigast at ganga teimum heilt væl. Teir vunnu seg nevnuliga allir tríggir í hálvfinalurnar, har Hugin Albinus av Tvøroyri eisini hevði vunnið seg til. Byrjað var annars í tveimum bólkum á fimm leikarar, og síðani komu tveir víðari úr hvørjum bólki.

Bólk 1 vann Hans Jákup Kollsker úr HABi og Gunnleif Danielsen úr HABi bleiv næstur.
Bólk 2 vann Hugin Albinus úr TVBF og Óskar Eiriksson úr HABi bleiv næstur.

Í hálvfinalunum møttust síðani Hugin og Gunnleif, meðan Hans Jákup og Óskar hittust í hinari Her vunnu Óskar og Hugin, og teir skuldu so spæla finaluna. Bronsudystin spældu Hans Jákup og Gunnleif, og triðja pláss vann Gunnleif sær, við at sigra á liðfelaga sínum.

Lagt varð upp til eina sera spennandi finalu, tí bæði Hugin og Óskar høvdu víst gott spæl í kappingini. Men bert eini leikarin rakti góða spælið í finaluni, og tað var karismatiski havnarmaðurin, Óskar Eiriksson. Hann vann stórsigur á Hugini, sum ikki hevði ein góðan dyst, og var ómetaliga óheppin í nógvum støðum.
Onki skal tó takast frá Óskari, sum við dirvi og nærlagni stáplaði stig fyri stig á talvuna. Endaliga úrslitið bleiv 220 - 82 til Óskar, og hann kann sostatt kalla seg fyrsta vinnara av Lions Cup steypakappingini. Afturfyri innsatsin fekk hann steyp til ognar, umframt eitt ferðasteyp, sum hann sleppur at hava í varðveiðslu til kappingina komandi ár.

At enda vilja vit ynskja Óskari Erikssyni hjartaliga tillukku við meistaraheitinum.

 

15-06-2018

Max vann FM á heimavølli

Niels Petersen | 5/6/2018

Kappingarárið í billard er av á hesum sinni. Og tað endaði við einum sonnum braki, tá billardveteranurin av Tvøroyri, Max Rasmussen, ruddaði borðið og gjørdist føroyameistari - samfull 17 ár eftir, at hann vann sítt fyrsta føroyameistaraheiti. Hesaferð gjørdi hann eisini heimbýnum Tvøroyri ta æru at bera gullið heim. Og tað var eisini við maner, at hesin knái og róligi suðuroyingurin í finaluni bar gullið heim við at vinna á ikki færri enn fýra fyrrverandi Føroyameistarum – eftir at hann í undankappingini eisini hevði vunnið á enn tveimum fyrrverandi FM-meistarum. Max kom, sá og sigraði.

Tað kom tí heldur ikki óvart á nakran, tá fryntligi og spakmætli billardspælarin av Tvøroyri, gjørdist ovurfegin av úrslitinum. Neyvan hevði hann sjálvur frá byrjan av kappingini roknað við, at hann fór at endurvinna meistaraheitið frá 2001, nú har vóru ikki færri enn fýra fyrrverandi FM meistarar við í finaluhópinum. Við hundrað prosents konsentratión og eini ró fáum er givið fekk Max nærum alt at bera til, og við tí rætta tempoinum og teimum røttu vinklunum rukku kúlurnar á mál. Men hetta var ikki bara sum at siga tað. Mótstøðan var øgilig.

Eingir minni enn fyrst táverandi FM meistarin úr Fuglafirði, Jákup Baldvinsson, sum hevur vunnið kappingina seinastu trý árini, síðani Kristian Sune Høgnesen, ið hevur vunnið uppaftur fleiri FM-heiti og haraftrat tvær komandi billardstjørnur, Hallur Joensen og Páll Heri Nolsøe, ið eisini hava vunnið kappingina áður.

Haraftrat megnaði Max eisini at vinna á tveimum øðrum fyrrverandi FM-meistarum í innleiðandi kappingini, billardveteranunum Jan Müller og Sofus Baldvinsson. Sostætt ber til at siga, at nýggi Føroyameistarin legði ikki færri enn 6 FM-meistarar afturum seg í undan- og finalukapping. Einki minni enn eitt bragd má sigast.

Eftir at hava spælt seg til finaluumfarið saman við Halli Joensen, skuldi Max undir torførar dystir móti fleiri av okkara frægastu billardspælarum. Har megnaði hann tó at vinna seg heilt fram til finaluna sjálva, har hann fekk ta nærum ómøguligu uppgávuna at møta trýfalt FM-meistaranum úr Fuglafirði, Jákup Baldvinson. Tá avtornaði lág Max omaná, eitt nú væl stuðlaður av eini megaseriu uppá 216 eygu í 13. umfari. Eftir tað var lítil ivi um, at Max fór við sigrinum. Og so varð.

Í dystinum um bronsuna vann Hallur Joensen úr Klaksvík á enn einum fuglfirðingi, Jens Kjartan Feilberg, sum tó hevur staðið seg sera væl í øllum kappingarárinum, eitt nú við at vinna liðkappingina. Eingin ivi er um, at hann fara vit at síggja meira til komandi kappingarár. Um Hall er at siga, at hann nú aftur verður at síggja í føroyskum billardhøpi, eftir at hava verið burturstæddur í tvey ár. Eisini hann er eitt gott boð um ein komandi FM-vinnara. Samanumtikið kann sigast, at føroyskt billardspæl hevur ment seg ómetaliga nógv seinastu árini við fleiri sera sterkum spælarum.

Hinir fýra spælararnir, sum vóru við í finaluumfarinum hesaferð, vóru Kristian Sune Høgnesen, Jógvan Jørgensen og Niels Nielsen.

Av Tvøroyri frætta vit, at FM í billard fyri einstaklingar virkaði fyrimyndarligt. Var væl fyriskipað, væl dømt, og sum heild væl avgreitt. Eftir kappingina vórðu steyp latin vinnarunum í bæði staklinga- og liðkapping. Vinnarin av liðkappingini gjørdist Fuglafjarðar Klubbi. Føroya Bjór var høvuðssponsorur til enn eina FM kapping í billard.

Næsta billardár byrjar aftur í oktober/november.

 

18-04-2018

Freistin fyri tilmelding er í morgin

Niels Petersen | 18/4/2018

Í morgin, 19. apríl er freistin at melda seg til undankappingina í billard fyri einstaklingar. Henda undankapping og síðani innleiðandi umfar verður spælt í Havn, vikuskiftið 27.-28. apríl. Og endamálið er at finna tveir leikarar sum fáa rættin at taka lut í endaliga finaluumfarinum á Tvøroyri, 4. - 5. mai.

Enn er sostatt møguleiki at melda seg til undankappingina, og tað ger man við at kontakta Urbanus K. Olsen ella Niels Petersen á 256018, 221078 ella við at viðmerkja á Facebook bólkinum, Billard FO.

Vónandi brúka fleiri henda møguleika, og at vit fáa eina góða og siðiliga kapping.

Við billardkvøðu

BiSF

#Anchor-o0pe "Anchor-o0pe"

08-04-2018

Jákup og Jens Kjartan fyri triðju ferð

Niels Petersen | 8/4/2018

Triðja árið á rað eydnaðist tað fuglfirðingunum, Jákup L. Baldvinsson og Jens Kjartan Feilberg at vinna FM heitið í billard fyri lið. Vinmenninar, sum spæla við besta liðnum hjá Billardfelag Fuglafjarða (BFF1) vóru í sínum síðsta umfari á Tvøroyri á vitjan hjá Páll Hera Nolsøe og Max Rasmussen, sum alt kappingarárið hava givið teimum ein sera skarpan gang. Tvøramenn høvdu ein dyst eftir eftir hendan dystin, og tað var móti teimum næstbestu hjá fuglfirðingum, og tí mátti eitt gott úrslit fáast til høldar á Tvøroyri.

Eitt gott úrslit var eisini júst tað teir fingu. Tað endaði púra javnt millum teir bestu av Tvøroyri og úr Fuglafirði, 4-4. Við javnleikinum á Tvøroyri hálaðu Jákup og Jens Kjartan seg upp á 54 stig, seks fleiri enn Páll Heri og Max, sum undan ársins síðsta dysti sostatt høvdu 48 stig. Spenningurin var tí øgiligur, tá næstbesta fuglfjarða liðið vitjaði á Tvøroyri, og mín sann, um tað ikki akkurát eydnaðist BFF2 at vinna eina dystin, so úrslitið bleiv 6-2 til tvøramenn. Tað rakk til sigur til tvøramenn, og upp undir liðina á BFF1 á stigatalvuni, men av tí at BFF1 hevði skorað nógv meiri eygu gjøgnum árið, vóru tað teir sum struku við FM heitinum.

Triðja pláss fór til Kristian Suna Høgnesen og Sonhard Johannesen úr Klaksvíkar Billardffelag.

Hetta kappingarárið hevur verið bæði tætt og spennandi allan vegin frá byrjan til enda, og bert nøkur eygu blivu munurin, tá alt kom til stykkis.
Hóast kappingarárið í liðkappingini er avgreitt, so manglar enn FM kappingin fyri einstaklingar, sum verður hildin vikuskiftið 4. - 5. mai á Tvøroyri.

Allar deildir avgreiddar
Í 2. deild var tað eisini eitt vinnandi lið úr Fuglafirði, og mín sann, um ikki tað var primus motor, the grand billard legend himself, Sofus Baldvinsson og makkari hansara Rúni Jacobsen sum struku avstað við fyrsta plássinum. Í hølunum á teimum, eins og teir vóru alt árið á tamb, komu Urbanus K. Olsen og Petur Joleiv Svøðstein úr Klaksvíkar Billardfelag. Á triðja plássi endaðu tvøramenn, mannaðir við Eyðun Gullok Svalbard, Bjarna Thomsen og Tórður Holm.

Í 3. deild vóru fuglfirðingar eisini í oddinum, men ikki ovastir, tí tað plássið vunnu Hans Jákup Nystrøm og Allan Larsen úr Klaksvíkar Billardfelag, meðan Jákup Jákup Gaard og Jákup Oluf Fløhamar blivu næstir. Hetta bleiv alt avgreitt í finaluumfari á Tvøroyri í mars mánaða. Tvøramenn vunnu bronsuna, sum Danjal Olsen og Niels Petersen tryggjaðu teimum.

 

16-03-2018

Klaksvíkingar vilja spæla við í oddinum

Niels Petersen | 16/3/2018

Mestur, sum á myndini, hevur Kristian Suni Høgnesen møguliga staðið og hugsa um leiklutin hjá sær og makkaranum, Sonnhardi Johannesen í oddastríðnum í føroyskum billard. Í øllum førum man hann vera komin til niðurstøðuna, at hann vil vera partur av oddastríðnum. Tí við einum flottum 6-2 sigri á fuglfirðingum í gjár hálaðu klaksvíkingar seg upp á 36 stig. Nú hava teir bert 6 stig upp til silvurmerkini og 8 upp til gullmerkini.

Páll Heri Nolsøe og Max Rasmussen úr Tvøroyrar Billardfelag halda sostatt enn fast í oddasessinum, og hava teir higartil vunnið seg upp á 44 sig, sum er tvey fleiri enn fuglfirðingarnar, Jákup L. Baldvinsson og Jens Kjartan Feilberg. Á triðja plássi koma síðani klaksvíkingar, og á fjórða plássi eru havnarmenn á liðnum, HABI 1. Á teimum síðstu plássunum eru næstbestu liðini hjá fuglfirðingum og havnarmonnum.

Bert tvey umfør eru eftir at spæla í landskappingini í 1. deild og spenningurin er avgjørt í hásæti.

 

22-02-2018

Finaluumfar avger vinnarin av 3. Deild

Niels Petersen | 22/2/2018

3. Deild er, sum áður greitt frá, skipað øðrvísi í ár. Eftir innleiðandi bólkaspæl, varð endaspæl spælt, fyri at finna tey fýra liðini sum í finaluumfari skulu spæla um meistaraheitið í 3. Deild hetta kappingarárið.
Endaspælið varð deilt í tveir bólkar. Ein bólkur spældi í Fuglafirði og ein í Klaksvík. Her spældu tvey lið á Tvøroyri seg víðari, umframt eitt úr Fuglafirði og eitt úr Klaksvík. Finaluumfarið verður spælt á Tvøroyri 24. mars, og verður tá byrjað við hálvfinalunum báðum. Síðani verður bronsudysturin avgreiddur, og at enda finalan.

Í vikuni varð eisini kunngjørt, at FM fyri einstaklingar verður spælt á Tvøroyri vikuskiftið 27.-28. apríl. Og um tað er neyðugt, so verður arbeitt við at avgreiða innleiðandi kapping í Havn vikuskiftið júst undan FM vikuskiftinum.



Rokniarkið til seriuinnskriving er eisini dagført, og hevur ein eyka teig til dómarar, sum skal fyllast út.

Vit ynskja tykkum eitt gott kappingarár.

Heimasíðutoymið

#Anchor-o0pe "Anchor-o0pe"

29-01-2018

Oddaliðið misti flogið á heimavølli

Niels Petersen | 29/1/2018

Nú helmingurin av kappingini í 1. deild er avgreidd kann staðfestast, at tað er sera javnt í oddastríðnum. Fuglfirðingar eiga enn oddaliðið, men heldur óvæntað hevur BFF1 millum annað mist 2 stig til sítt egna BFF2. Harafturat spældu tvøramenn seg til ein góðan 4-4 javnleik í Fuglafirði móti BFF1. Tvøramenn vunnu eisini 6-2 á næstbesta liðnum úr Fuglafirði, so talan bleiv um góða úrtøku til suðuroyingarnar. Enn hevur BFF1 tó 6 stig niður til tvøramenn, men minnast má til, at tvøramenn hava ein dyst til góðar.

Havnarmenn eru annars byrjaðir at røra uppá seg í oddastríðnum, og í kvøld hálaði HABI1 seg upp um KLBF1, og yvirtekur sostatt 3. plássið. Klaksvíkingar hava tó, eins og tvøramenn, ein dyst til góðar, og júst hesi bæði liðini møtast komandi vikuskifti á Tvøroyri.

Spenningurin er øgiliga stórur, tí bæði tvøramenn og klaksvíkingar kunnu gera eitt hál, og harvið innheinta oddaliðið.

Til stuttleikar kann nevnast, at ein leikari hevur megnað nakað sum ikki so nógvir gera longur. Árant Berjastein, á BFF2 vann nevnuliga á bæði Jákup L. Baldvinsson og Páll Hera Nolsøe í sama vikuskifti. Árant lá undan vikuskiftinum aftastur á styrkislistanum, men gjørdi um vikuskiftið eitt ordans hál, og tað er stuttligt at síggja, at um teir bestu ikki ansa sær, so fáa teir oyruni í maskinuna. Flott Árant.

 

27-01-2018

Dagført Excelskjal við útskriftum

Høgni Højgaard | 27/1/2018

Excel-skjalið til innskriving av serium er dagført í dag. Dómaralistin er dagførdur, og nú er eisini møguligt at prenta bæði úrslitasíðuna og dómaraseðilin beinleiðis til prentara. Um tit hava eina teldu og prentara við til dystirnar, sleppa tit undan at skriva við hond hereftir. Hetta vónandi til gleði fyri allar smiley

 

18-01-2018

Ymiskar dagføringar eru gjørdar

Niels Petersen | 18/1/2018

Ymiskar dagføringar eru gjørdar á heimasíðuni til inniverandi kappingarár, og í høvuðsheitum hevur tað við tað at gera, at vit nú mugu skráseta dómararnar sum trúgvir veita feløgunum eina ómetaliga stóra hjálp. Fyri at tað sær penari út, so er pláss gjørt til ásettu dómararnar á manuella innskrivingarseðlinum, sum kann prentast út á heimasíðuni.

Hava tit ikki nakrar linjur undir tí klassiska manuella innskrivingarseðlinum, so merkir tað heilt einfalt, at tit hava prenta tann gamla innskrivingarlistan. Í so fall, má man, meðan man hevur innskrivingarseðilin opnaðan á síðuni, trýsta á F5 knøttin, so at dokumentið endurnýggjar seg. Og so skuldi alt koyrt sum smurt.

Rokniarkið til seriuinnskriving er eisini dagført, og hevur ein eyka teig til dómarar, sum skal fyllast út.

Vit ynskja tykkum eitt gott kappingarár.

Heimasíðutoymið

#Anchor-o0pe "Anchor-o0pe"

25-12-2017

Gleðilig jól

Niels Petersen | 25/12/2017

Billardsamband Føroya vil hervið ynskja tykkum øllum sum varða av billardítróttini eini gleðilig jól og eitt eydnuberandi nýggjár. Eisini tit, sum eru á sjónum um høgtíðina, ella eru staddir uttanlands, verður borin ein heilsa. Vit síggjast kring billardborðini í 2018.
2018 verður eitt gott ár.

Við billardkvøðu

 

05-12-2017

Stórur spenningur í oddinum

Niels Petersen | 5/12/2017

Sonnhard Johannesen og Kristian Suni Høgnesen úr Klaksvíkar Billardfelag hava higartil vunnið sær 18 stig fyri 4 dystir, og liggja á odda í bestu billarddeildini. Men beint í hølunum á teimum eru fuglfirðingar og tvøramenn, sum bæði hava spælt ein dyst færri enn oddaliðið. Sostatt er spenningurin rættuliga stórur, nú vit nærkast at helmingurin av kappingini er spældur.

Fuglfirðingar, Jákup Baldvinsson og Jens Kjartan Feilberg, sum vunnu liðkappingina farna kappingarár hava eins og klaksvíkingar vunnið sær 18 stig, men klaksvíkingar hava munin, tí teir hava vunnið sær fleiri eygu. Fuglfirðingar hava tó ein dyst til góðar, og kunnu tískil hála seg framum. Vinna tvøramenninar, Páll Heri Nolsøe og Max Rasmussen dystin sum teir hava til góðar, so kunnu eisini teir yvirhála klaksvíkingar. Men munurin verður í besta føri minimalur, og er spenningurin sostatt í hæddini nú fjórða av tíggju umførum er við at vera avgreitt.

Í 2. deild eru tað somu feløg sum kappast heilt frammi í oddinum. Klaksvíkingar og fuglfirðingar eru tó farnir nakað undan tvøramonnum, sum eru fremstir av hinum aftanfyri. Urbanus Knud Olsen og Petur Joleiv Svøðstein eru teir sum manna oddaliðið úr Klaksvík. Fremstu biðlarnar eru úr Fuglafirði, og er tað aldursforsetin, Sofus Baldvinsson sum gongur undan. Makkari hansara er ungi og envaríki Rúni Jacobsen. Á triðja plássi eru tvøramenninar, Eyðun Gullok Svalbard, Bjarni Thomsen og Tórður Holm (substituttur).

Í 3. deild er torført at taka dagar millum hvørjir spæla seg í A bólkin og B bólkin, eftir innleiðandi bólkaspælið. Í bólkinum Norður spæla trý lið, og har er onki avgjørt, tí øll púra jøvn í stigum. Í bólkinum Suður sær tað hinvegin út til at vera avgjørt hvørjir koma at spæla í A bólkinum eftir innleiðandi bólkaspælið og hvørjir skulu spæla í B bólkinum. Eitt umfar írestar av innleiðandi bólkaspælinum, og greitt er, at Hugin Albinus, Rókur Dimon, Danjal Olsen og Niels Petersen spæla í A bólkinum í aðru kappingarhálvu. Gundur Johansen, Hans Olaf Hentze, Carl Bech og Rói Einarsson spæla í seinnu kappingarhálvu í B bólkinum.

31-10-2017

So trilla billardkúlurnar kring landið

Niels Petersen | 31/10/2017

Fyrstu dystirnar í øllum trimum deildunum eru nú leiktir, og meðan summir leikarar enn leita eftir essunum í lummanum, so eru aðrir komnir flúgvandi frá byrjan. Soleiðis er tað nú einaferð.

Í 1. deild sær Jákup L. Baldvinsson út til at hava fingið eina flúgvandi byrjan, og hevur megnað at hildið formin frá Haldor Holm Cup við líka. Við ørandi tølum hevur hann fyribils lagt seg á odda millum einstaklingarnar, og formurin hjá makkara hansara, Jens Kjartani Feilberg er eisini sera góður. Hesir verða at meta sum favorittar til at endurvinna meistaraheitið, men kappingin er hørð í oddinum, og fleiri kunnu taka stig frá teimum. So at avgera nakað meistaraheiti longu nú er ørskapur.

Spenningurin verður um, hvør kann arga favorittarnar úr Fuglafirði, og hvussu teir fara at takla tað.

Í 2. deild er, aftur í ár, stórur spenningur um, hvørji lið fara at royna seg best. Nógvir leikarar eru tættir, og fleiri vísa, at teir eru væl og virðiliga klárir til stigið upp í 1. deild. Spennandi verður at fylgja gongdini í vetur.

3. deildarleikararnar eru eisini byrjaðir, og spennandi verður eisini at fylgja teimum, nú kappingin á fyrsta sinni er skipað sum bólkaspæl og síðani endaspæl.

Við billardkvøðu
BiSF

#Anchor-o0pe "Anchor-o0pe"

19-10-2017

Kappingin í 3. Deild verður skipað eitt sindur øðrvísi í ár. Tað eru átta lið meldaði til, harav heili fýra eru av Tvøroyri. Praktiskt fóru vit at fáa trupulleikar við at avgreiða teir mongu dystirnar, so tað bleiv valt at umskipa kappingina til innleiðandi bólkaspøl, Norður og Suður, og síðani í endaspøl, A og B.

Tvey tey bestu liðini í innleiðandi bólkunum sleppa at spæla í bólki A í endaspælinum og hini sleppa at spæla í endabólki B.

Kappingarárið byrjar leygardagin 28. oktober.

 

12-10-2017

Ein broyting er framd í kappingarskránna hjá 2. Deild. Í síðstu løtu hava klaksvíkingar valt at taka eitt av liðum sínum úr deildini. Í staðin er eitt lið hjá Havnar Billardfelag lagt afturat. Broytingarnar eru rættaðar á leikskránni eisini, so nú er bara eftir at koma í sving.

07.03.2017

FM FYRI EINSTAKLINGAR 2017.

Føroyameistara kappingin fyri einstaklingar 2017 verður í Klaksvík 21. og 22. apríl. 

Undankapping verður fríggjakvøldið 7. apríl kl.19.00. og innleiðandi 8. apríl. kl.10.00. í Klaksvík.

Kappingin verður skipað eftir: Reglugerð fyri kappingar undir Billard Samband Føroya. 

Tilmelding á 215215, 256018 ella á facebook bólkinum.

Seinasta freist at melda til innleiðandi er: 04.04.2017.

Vinarliga
B.S.F.

#Anchor-o0pe "Anchor-o0pe"

11.04.16

FM fyri einstaklingar 2016.                                                              

Kappingin verður um vikuskiftið 15 og 16 apríl. Bólkaspælið birjar fríggjadagin kl. 13:00. 

Bólkur 1.  Hallur Joensen, Sonhard Johannesen, Niels Nielsen og Jan Múller.

Bólkur 2.  Jákup L. Baldvinsson, Kristian Suni Høgnesen, Jens Kjartan Feilberg og Jógvan Jørgensen. 

Endaspæl og finala verða leygardagin

 

26:03:15

ÁRSVEITSLAN 2015                                                                      

Nú ber eisini til at melda seg til ársveitsluna, sum verdur leygardagin 4. apríl kl. 19:00. Til matna verður oksabørbradur vid eplabátum, pipar sós, og stoktum grønsakjum. Kostnaður fyri ársveitsluna er 180 kr. pr. høvd. 
- Tilmelding við at siga mær frá á tlf. 272690. Øll billard áhugaði eru vælkomin at melda seg til.
Seinasta freist at tekna seg til veitsluna er Týsdagin 31. Mars.

Vegna BSF Páll Heri

07.03.2015

FM FYRI EINSTAKLINGAR 2015.                                                

FM fyri einstaklingar 2015.
Kappingin verður spæld 2. 3. og 4. Apríl í Havn.
- Teir seks leikarirnir vid hægsta miðaltali, kvalifisera seg beinleiðis til finaluumfarið, sum verður spælt Fríggjadag og Leygardag 3. og 4. Apríl. Innleiðandi kappingin, har spælt verður um tvey tey seinastu plássini í finaluumfarinum, verður spælt Skírishósdag 2. Apríl. 
"Í innleiðandi kappingini kunnu eisini bert verda 8 leikarir. Tískil kemur onkur møguliga eisini út fyri at skula spæla um at koma í innleiðandi kappingini. Hetta má so spælast okkurt kvøldi gjøgnum vikuna upp til FM. Hetta síggja vit betur, tá vit vita hvørjir melda seg til"
Allir bólkar verða sum áður deildir eftir miðaltali.
- Tit ið vilja melda tykkum til innleiðandi kappingina, verða vinaliga bidnir um at viðmerkja undir hesum tráði, ella geva mær eini bod, antin via facebook, ella á tlf. 272690. Seinasta freist at melda seg til kappingina er leygardagin 28. mars.
- Eftir finaluna verður sum vanligt ein ársveitsla við steypahandan, røðum, og góðum mati. Øll áhugaði eru vælkomin at melda seg til. Meiri info um hetta kemur seinni. 

Vegna BSF Páll Heri Nolsøe.

Stovnað t. 19/10/2016, 15:34:49.
Seinast dagførd t. 19/02/2020, 18:00:58.